Abel Caballero avanzou que a primeira reunión terá lugar esta semana co obxectivo de lograr un consello “do máximo nivel” nun proxecto de recuperación “ordenado, apoiado e buscando a interlocución de tódolos ámbitos” porque “por forza temos ir xuntos na saída da crise”

O rexedor informou este luns que iniciou xa os contactos para constituír un consello da cidade no que estean representados tódolos sectores económicos, sociais, educativos e investigadores co fin de preparar a recuperación da economía da cidade. Estarán presentes a Universidade de Vigo, a automoción, o naval, o comercio, a hostalería, o turismo, a investigación, os despachos profesionais, a edificación, a construción e a cultura como parte do desenvolvemento económico de Vigo. Tamén Zona Franca e a Deputación de Pontevedra con presenzas xa confirmadas como o reitor ou o xerente de ARVI.

“Quero un consello do máximo nivel no que estea toda a cidade”, apuntou Abel Caballero, co obxectivo de trazar dende o Concello un “proxecto de recuperación ordenado, apoiado e buscando a interlocución con tódolos ámbitos do espazo económico, administrativo e político. Primeiro, co goberno de España, segundo, impulsando con Europa e terceiro coa Xunta de Galicia e a nosa propia coordinación da cidade”, explicou.

O rexedor pediu “xenerosidade” a todo o mundo consciente, dixo, de que hai moitas ideas, capacidade e necesidade nestes momentos e dado que “por forza temos ir xuntos na saída da crise”. Engadiu que estamos “nun momento como nunca houbo na historia da cidade e a saída temos que facela desde a coordinación, o acordo e marcha conxunta”.

A primeira reunión do consello da cidade será esta mesma semana, iniciándose un sistema de planificación no que “xa estamos traballando para Vigo e tamén para a FEMP”, apuntou Caballero.